Եղևնի Համո Սաhյան
Անտառից եկած կանաչ եղևնին,
Հիշում է կանաչ իր ընկերներին,
Արահետներն է հիշում ձյունի տակ,
Հիշում է բացատն ու բուքն սպիտակ:
Երկինքն է հիշում իր գլխի վերև,
Եվ իր մայր անտառն ասեղնատերև,
Հովերն է հիշում նա գարնանային,
Որ իրեն այնպես օրորում էին:
Վաղորդյան ցողի գոհարն է հիշում,
Եվ մայրամուտի թևերն աբրեշում,
Հիշում է սոսափն ամեն մի ծառի,
Խարույկն է հիշում անտառապահի:
Հիշում է բոլորն ու չի ափսոսում,
Որ էլ անտառի երգը չի լսում,
Ինչո՞ւ ափսոսա, երբ իր թևերին
Գարուն է բերել երեխաներին,
Գարուն է բերել այս ձմռան օրով
Եվ տուն է մտել կանաչ շորերով.
Ե՞րբ է նա այսպես զուգվել, զարդարվել
Եվ մարդկանց այսքան հրճվանք պատճառել,
Ե՞րբ է նա եղել այսքան երջանիկ
Ու ե՞րբ է տեսել այսքան խաղալիք:
Ե՞րբ են նրա մոտ այսքան մանուկներ
Երգել ու պարել մինչև ուշ գիշեր…
Զարդարանքներով, աստղերով իր պերճ
Կանգնել է ուրախ մանուկների մեջ,
Այնպես հպարտ է նայում աշխարհին,
Կարծես հենց ինքն է բերել Նոր տարին:
Հարցեր և առաջադրանքներ
- Անհասկանալի բառերը դո՛ւրս գրիր և բառարանի օգնությամբ բացատրի՛ր: Արահետ-նեղ ճանապարհ Բացատ-դատարկ տեղ Վաղորդյան- առավոտյան Ցող-բարակ մանր անձրև Աբրեշում-մետաքս: Սոսափ-շարժվելուց առաջացող մեղմ ձայնը, սոսավ: Պերճ-Շքեղ, զարդարուն
- Ի՞նչ էր հիշում եղևնին: Պատմի՛ր եղևնու անունից: -Ես հիշում եմ իմ կանաչ ընկերներին, Արահետները ճերմակ ձյունի տակ։ Երկինքն եմ հիշում իմ գլխի վերև Եվ իմ մայր անտառն ասեղնատերև։
- Եղևնին ի՞նչ էր զգում անտառից հեռու: Եղևնին անտառից հեռու զգում էր տխրություն և դատարկություն իր շուրջ բոլորը։
- Նա ափսոսո՞ւմ էր, որ այլևս անտառում չի: Նա չէր ափսոսում, որովհետև իր թևերին Գարուն էր բերել երեխաներին։
- Ինչո՞ւ էր նա հպարտ նայում աշխարհին: Նա հպարտ նայում էր աշխարհին կարծում էր հենց ինքն է բերել Նոր տարին։
